Sut i gysylltu â'r cwmni trenau
Yr Amwythig
Mae’r Amwythig yn dref y mae llawer yn ei hoffi a’i hedmygu nid yn unig am y bensaernïaeth hynafol a deniadol a strydoedd canoloesol ond hefyd am y dewis eang o siopau modern ac annibynnol. I gyrraedd yno, heb drafferthion parcio, argymhellwn y trên.
Gallwch ddisgwyl darganfod
Mannau da i fwyta a siopa.
Marchnadoedd a gwyliau stryd.
Theatr a chelfyddydau.
Castell Amwythig
.
Abaty Amwythig.
Hen neuadd gerddoriaeth yw’r amgueddfa.
Mae cerflun Quantum Leap ar lan yr afon gyferbyn â’r theatr... sy’n nodi 200fed pen blwydd Darwin.
Strydoedd gydag enwau gwych fel Butcher Row, Fish Street a Grope Lane.
Wyddech chi:
Ganwyd Charles Darwin yn yr Amwythig?
Mae digon i ddathlu ei fywyd a’i waith yn y dref ac mae ei gerflun tu allan i’r llyfrgell.
I ffwrdd i’r bryniau...
Ewch ar y trên yn yr Amwythig ac anelwch am y de a chyn bo hir byddwch mewn rhanbarth nad yw datblygiadau trefol na diwydiannol wedi ei gyffwrdd bron, ar wahân i’r ffermio traddodiadol.
Mae’r byd yn agor wedi gadael y dref, gydag un o’r ardaloedd cyntaf i’w dynodi’n Ardal o Harddwch Naturiol Eithriadol. Croeso i Fryniau Amwythig. Mwynhewch y golygfeydd bob cam i Drefyclo, neu gadewch y trên yn un o’r gorsafoedd llai ar hyd y ffordd:
Church Stretton
Gadewch y trên yn y fan hon er mwyn mynd am dro – neu redeg – i fyny’r Long Mynd neu edrychwch o gwmpas sioe’r stryd fawr a chaffis y dref cerddwyr hon. Ar ochr arall Church Stretton ceir Caer Caradoc a’r Wenlock Edge atmosfferig tu hwnt.
Craven Arms
Gadewch y trên yn y fan hon i ddechrau ar Lwybr Cerdded Lein Calon Cymru. Peidiwch ag anghofio canolfan arddangos a chaffi Canolfan Ddarganfod Shropshire Hills – taith gerdded o bum munud yn unig ar hyd y ffordd o’r orsaf.
Broome, Hopton Heath a Bucknell
Mae’r gorsafoedd bach hyn yn fynedfeydd i gefn gwlad ardderchog i gerdded a seiclo gyda llwybrau coedwig a llwybrau goriwaered yn Bucknell a Hopton Heath.
Mwynhewch awyrgylch gwych y tafarnau lleol, profwch y cynnyrch lleol, efallai aros am noson neu ddwy mewn gwely a brecwast teuluol. Chwiliwch am hen eglwysi prydferth, toreth o stiwdios celf agored a chaffis celf, bridiau defaid anarferol, siopau a chaffis cymunedol ar hyd y ffordd.
Wyddech chi:
Yn y gororau y ceir y nifer fwyaf o gestyll mwnt a beili yng Nghymru a Lloegr?
Dros y ffin i Gymru
Mae’r trên yn croesi’r ffin i Gymru yn Nhrefyclo. Mae’n werth ymweld â’r dref farchnad brysur hon. O orsaf Trefyclo taith gerdded fer yw hi dros y bont i ganol y dref. Yn Nhrefyclo ceir siopau bach a chaffis da ac ar ben y stryd fawr chwiliwch am Ganolfan Clawdd Offa ar y dde a’r arddangosfa rad ac am ddim ar Offa, Brenin Mercia a’r arwr Cymreig Owain Glyndwr.
O Drefyclo mae’r trên yn teithio trwy'r hen sir Faesyfed (rhan o Bowys erbyn hyn) ar y ffordd i Landrindod trwy gymunedau gwledig bywiog gan gynnwys Cnwclas, Dolau, Pen-y-bont. Mae llawer o Sir Faesyfed yn y mynyddoedd. Mae defaid yn pori ar y llechweddau, ac yn hyfrydwch i selogion y wlad wyllt. Mae Coedwig Maesyfed, sy’n gartref i ddraig olaf Cymru yn ôl y sôn, yn ymestyn i’r de – man i’w archwilio – gyda gweundiroedd, coedwigoedd ac afonydd. Wedi cyrraedd tref ffynhonnau Fictoraidd Llandrindod, mae cyfle hefyd i ddal bws i Raeadr ac oddi yno gwnewch y daith gerdded 3 milltir i hyfrydwch Cronfeydd Cwm Elan https://www.traveline.cymru
Edrychwch am:
Draphont Cnwclas. Mae’r draphont hon (un o ddwy ar y lein – gweler hefyd Cynghordy) yn rhychwantu llednant yr Afon Teme rhwng Trefyclo a Chnwclas. Mae iddi 13 bwa, gyda chanllawiau crenellog eiconig, tyrau crwn ar bob pen a thyrau sgwâr yn y bwtresi.
Trefi’r Ffynhonnau
Mae’r trên yn teithio ar draws Canolbarth Cymru trwy hen “Drefi’r Ffynhonnau”. Roedd pobl yn teithio yma’n arbennig i nofio ac yfed y dyfroedd iachusol, oedd yn llawn mwynau o’r bryniau. Mae’r trên yn aros yn nhrefi ffynhonnau Llandrindod, Llanfair ym Muallt, Llangamarch a Llanwrtyd, cyn croesi o Bowys i Sir Gaerfyrddin.
Mae Llanfair ym Muallt yn gartref hefyd i Sioe Frenhinol Cymru, sioe fendigedig ag iddi awyrgylch wledig go iawn. Ceir trenau arbennig adeg y Sioe Fawr o Abertawe i Ffordd Llanfair ym Muallt gyda gwasanaeth bws gwennol o’r orsaf i faes y sioe. Mae’r trenau hyn yn boblogaidd tu hwnt, ac fel arfer ceir awyrgylch gwych (a llawer iawn o fagiau teithio) arnynt.
Peidiwch â cholli:
Cneifio defaid (mae cneifio wedi datblygu – i raddau – yn gystal camp genedlaethol â rygbi ), y cobiau Cymreig, gasebo Lein Calon Cymru (wel fe fyddem ni’n dweud hynny) a’r stondinau niferus sy’n arddangos cynnyrch Cymreig.
Pen y Fâl i Lanymddyfri ar hyd Traphont Cynghordy
O Lanwrtyd ceir tynfa hir i fyny i Ben y Fâl, un o rannau mwyaf ysblennydd y rheilffordd gyfan. Ar gopa Pen y Fâl mae’r trên yn plymio i dwnnel hir, tywyll trwy’r bryniau gyda golygfeydd godidog i groesawu teithwyr ar yr ochr arall. Ymhellach ymlaen mae’r trên yn croesi Traphont brydferth, ddolennog Cynghordy. Arhosfan ar gais yw Cynghordy ei hun, ond mae’n werth ymweld i gerdded trwy’r pentref i Landwr a dilyn y ffordd fach dan y draphont i weld y campwaith pensaernïol hwn.
O Gynghordy, yr arhosfan nesaf yw Llanymddyfri. Tref reilffordd go iawn a’r fynedfa i Fannau Brycheiniog. Mae gan Lanymddyfri un o adeiladau gorsaf gorau’r lein, lle ceir caffi cymunedol croesawgar. Mae’n fan poblogaidd i gerddwyr gynhesu o flaen y llosgwr coed yn y gaeaf neu i ymwelwyr yr haf gael lluniaeth a phori drwy archifau Lein Calon Cymru sydd i’w gweld yno. Mae Te Prynhawn Arbennig Joan ar gyfer grwpiau yn wledd wirioneddol dda – cofiwch fwcio ymlaen llaw ar 01550 731283.
Gwlad Gerdded Go Iawn
Ers cryn amser defnyddiwyd y gorsafoedd o Lanymddyfri i Landybie trwy Langadog a Llandeilo gan gerddwyr brwd, gan eu bod yn arwain at wlad o gerdded godidog sydd yn aml yn heriol yn Sir Gaerfyrddin a Bannau Brycheiniog.
Edrychwch ar gyfarwyddiadau’r daith ar gyfer adrannau agored Llwybr Cerdded Lein Calon Cymru yn yr ardal hon. Os ydych yn gerddwr brwdfrydig, sy’n chwilio am olygfeydd godidog, copâu mynyddoedd a her, dyma’r man i chi.
Rhydaman, Aber Llwchwr ac i Lanelli
Yn Rhydaman, tref fwyngloddio hynafol gyda threftadaeth hudol, mae’r cefn gwlad yn newid unwaith eto wrth i’r trên anelu am forfeydd heli Aber Llwchwr ac ymlaen i Lanelli.
Os ydych yn hoffi rygbi, fyddwch chi ddim am golli gwychder Parc y Scarlets.
Dyma’r ddolen: http://
parcyscarlets.com
Dinas a Sir Abertawe
Ymlaen ar y trên unwaith eto trwy Dre-gŵyr ac i Abertawe ac rydych wedi cyrraedd pen deheuol y lein.
Peidiwch â methu:
Amgueddfa Genedlaethol y Glannau, sy’n adrodd stori diwydiant a mentrau Cymru trwy arddangosfeydd clywedol, gweledol a rhyngweithiol. Mae gan yr amgueddfa atgynhyrchiad o locomotif ager cyntaf y byd, gwasg briciau ac un o’r ychydig wagenni glo a oroesodd. www.museumwales.ac.uk/swansea
Mae Marchnad Abertawe, yng nghanol y ddinas, wedi gwasanaethu’r gymuned ers cenedlaethau. Marchnad brysur a bywiog yw hi gyda dros 100 o stondinau sy’n cynnwys cynnyrch lleol ffres ac anrhegion Cymreig traddodiadol a chyfle i brofi cocos enwog Abertawe, bara lawr a chawsiau da Cymru. Ceir arddangosfeydd celf a dyddiau hwyl teuluol ym Marchnad Abertawe hefyd. www.swanseaindoormarket.co.uk
Ydych chi’n edrych ymlaen at grwydro lawr i’r bae i fwynhau aer y môr? O Fae Abertawe gallwch gerdded i’r Mwmbwls neu ddal bws i deithio ar hyd prydferthwch Penrhyn Gŵyr – mae gwasanaeth bws ar gael os ydych am gael hoe www.swanseabaywithoutacar.co.uk Mae’n fyd rhyfeddol ac mae yma i ni ei archwilio, gobeithiwn y byddwch yn mwynhau eich taith ar hyd Lein Calon Cymru...
